Destino 3.0
Eva, 27, XINZO DE LIMIA

Din que o destino é ese fío invisible que nos conecta con todo aquelo que nos pasará, con todo o que veremos e sentiremos. María e Luís coinciden cada mañá no mesmo sitio e a mesma hora. Mentres esperan o semáforo os seus brazos case parecen tocarse, pero María, absorta nos vídeos que emanan do seu móbil e Luís tecleando, con dedos áxiles, mensaxes, non perciben a existencia do outro. Quizais sexa que o destino non contaba co avance das tecnoloxías ou quizais Luis e María estean destinados a permanecer xuntos sen tocarse como o Sol e a Lúa.