Falso merlo
Héctor Acebo, 37, A Coruña

Aquel pequeno corvo soñaba con ser un merlo. Máis que a voz, admiraba desta especie a elegante combinación de cores. O negro xa o tiña, pero faltáballe o amarelo, de maneira que comezou a tinguirse o pico con xugo de celidonia. Este líquido tamén lle permitía debuxar os aneis oculares, tan característicos do merlo. Todo ía ben ata a chegada da primavera; como non podía emitir sons melodiosos cos que atraer ás merlas, os outros paxaros do bosque comezaron a burlarse del. Morreu, profundamente amargado, como merlo. Esqueceuse de ser corvo.