Raíces
Raquel, 51, Ferrol

Cortaron as pólas,
arrincaron as follas,
cubriron a terra con outras voces.

Pareceu que a árbore morrera.

Chamaron progreso ao machado,
modernidade ao silencio.

Pensaron que abondaba.

Xa non se escoitaba o seu nome nas escolas,
nin nas cartas,
nin nos soños
de quen quería medrar.

Mais as raíces
non entenden de silencios.
Quedaron.
Agachadas. Teimosas. Agardando.

E cando chegou a chuvia,
a mesma árbore
volveu vestirse de verde.

Algúns chamárono rexurdimento.

As raíces,
simplemente,
nunca deixaran de falar.