Fume
Chucho, 63, Bertamiráns

Alí estabas ti. Tan perto de min, logo dun fío moi longo de tempo. Desde aquel día de agosto, décadas atrás, no río cruzándose as nosas olladas adolescentes, arroibados os dous pola calor e polo desexo sufocante.
Alí xacían os teus despoxos non lonxe dos meus, naquel tanatorio anódino de polígono industrial, logo de andarmos camiños bifurcados na vida, ti e mais eu. Aviados xa para a cremación ritual. Confundiríanse as volutas de fume, as partículas de carbono túas e miñas, enroscándose, caprichosas, tal vez enamoradas, cara un eter máis seu: a nosa modesta contribución aos gases de efecto invernadoiro.