Todo incluído
Venres, 52, Nigrán

Escolleron borrar o pasado e loitar contra o destino. Ela arrincou a única folla en branco que lle quedaba e lanzou á auga o seu diario e os reproches. El tirou do peto un bolígrafo de tinta violeta, sacudiu a desidia e escribiu un “quérote” na palma da man. Sentáronse xuntos, abrazándose, quizais, por derradeira vez. Miráronse aos ollos entendéndose. Decidiron aproveitar o pouco tempo que lles quedaba, antes de que marchara a luz, e escribir o seu futuro nun microrrelato. Ela bicouno na meixela mentres o barco remataba de afundirse e a noite caía sobre o bote salvavidas.